ការជ្រើសរើសវិនិយោគិនឱ្យបានត្រឹមត្រូវជាកត្តាសំខាន់មួយសម្រាប់សហគ្រិន ព្រមទាំងសម្រាប់គោលដៅអាជីវកម្មរយៈពេលវែងផងដែរ។ លើសពីនោះវិនិយោគិនដែលត្រឹមត្រូវសម្រាប់អាជីវកម្ម អាចជួយគាំទ្រចក្ខុវិស័យអាជីវកម្ម និងផ្ដល់ជាគុណតម្លៃជាច្រើនដែលអាចដឹកនាំ និងជំរុញឱ្យអាជីវកម្មអ្នកទទួលបានភាពរីកចម្រើនទៅមុខផងដែរ។
១. ការរំពឹងទុករបស់វិនិយោគិន
វិនិយោគិនដែលមានទុនវិនិយោគមានច្រើន និងងាយស្រួលរកសម្រាប់អាជីវកម្ម ប៉ុន្ដែស្វែងរកវិនិយោគិនដែលមានការរំពឹងទុកលើលទ្ធផលនៃការវិនិយោគ ដែលស្រដៀងគ្នាទៅនឹងគោលដៅអាជីវកម្មអ្នកមិនងាយនឹងរកបានឡើយ។ ជាក់ស្ដែងគោលបំណង ឬការចង់បានរបស់វិនិយោគិន និងសហគ្រិនអាចនឹងមានច្រើនប្រភេទដូចជា ចង់បានផលចំណេញ, មានតម្រូវការទុន, ត្រូវការបណ្ដាញអាជីវកម្មដែលអាចគាំទ្រអាជីវកម្មខ្លួន, ត្រូវការអ្នកប្រឹក្សាយោបល់អាជីវកម្ម, ត្រូវការបណ្ដាញទំនាក់ទំនង, ឬចង់បានអត្ថប្រយោជន៍ពីអាជីវកម្មក្នុងរយៈពេលវែងជាដើម។
២. រយៈពេលនៃការវិនិយោគ
ការជ្រើសរើសវិនិយោគិន សហគ្រិនគួរតែមើលទៅលើរយៈពេលនៃការវិនិយោគរបស់វិនិយោគិននោះ ថាតើពួកគេនឹងចង់ចាកចេញពីអាជីវកម្មអ្នកនៅពេលណា? តើពួកគេចង់វិនិយោគក្នុងរយៈពេលវែង ឬរយៈខ្លី? វាបង្ហាញពីផែនការវិនិយោគនៅពេលអនាគតមួយសម្រាប់វិនិយោគិន និងសហគ្រិន ដើម្បីដឹងពីរយៈពេលច្បាស់លាស់ និងអនុញ្ញាតឱ្យសហគ្រិនអាចរៀបចំផែនការរួចជាស្រេចនៅពេលដែលវិនិយោគិនចាកចេញពីអាជីវកម្មផងដែរ។
៣. ការរួមចំណែករបស់វិនិយោគិន
ការពិភាក្សាពីការរួមចំណែកពីខាងវិនិយោគិនជាគុណតម្លៃដែលវិនិយោគិនអាចផ្ដល់ឱ្យសហគ្រិន និងអាជីវកម្មក្រៅពីទុនដែលពួកគេបានវិនិយោគ។ ដូច្នេះ ការស្វែងយល់ជាមុនពីកម្រិតនៃការចូលរួមរបស់វិនិយោគិនបន្ទាប់ពីការវិនិយោគអាចធ្វើឱ្យភាគីទាំងសងខាងកំណត់ និងបែងចែកការងារ ឬពេលវេលាដោយប្រសិទ្ធភាព និងចៀសពីបញ្ហាដែលអាចកើតមានផ្សេងៗផងដែរ។
៤. កម្រិតនៃការយល់ដឹងពីអាជីវកម្ម/វិស័យ
ចំណុចដែលសំខាន់លើការជ្រើសរើសយកវិនិយោគិនដែលត្រឹមត្រូវនោះគឺ ការដែលអាចកំណត់កម្រិតយល់ដឹងរបស់វិនិយោគិនទៅលើអាជីវកម្ម ឬវិស័យដែលអាជីវកម្មស្ថិតនៅក្នុង។ ដោយសាររាល់ការសម្រេចចិត្ត និងការប្រឹក្សាយោបល់របស់វិនិយោគិនអាចជះឥទ្ធិពលផ្ទាល់ទៅលើដំណើរការអាជីវកម្មក្រោយការវិនិយោគ។ ហើយគុណតម្លៃដែលផ្ដល់ដោយវិនិយោគិនអាចនឹងជះឥទ្ធិពលអវិជ្ជមានដល់អាជីវកម្មប្រសិនបើសហគ្រិនមិនបានដឹងច្បាស់ពីវិនិយោគិននោះ។
ជារួម ប្រសិនបើអាជីវកម្មអ្នកត្រូវការទុន អ្នកមិនគួរជ្រើសរើសយកវិនិយោគិនគ្រប់រូបដែលអាចផ្ដល់តែទុនសម្រាប់អាជីវកម្មអ្នកនោះឡើយ។ អ្នកគួរជ្រើសរើសដោយផ្អែកលើកត្តាសំខាន់ផ្សេងទៀត ជាពិសេសទៅលើកត្តាទាំង ៣ ខាងលើ ដែលវាអាចធ្វើឱ្យអ្នកជ្រើសរើសបាននូវវិនិយោគិនដែលល្អត្រឹមត្រូវសម្រាប់អាជីវកម្ម។
